पर्यटकीय र उत्पादनको क्षेत्र, पूर्वाधार विकास सरकारको प्राथमिकता : अर्थमन्त्री डा. महत
बारा । अर्थमन्त्री डा. प्रकाशशरण महतले बारा जिल्लाको अथाह सम्भावना रहेको, तर त्यो सम्भावनाअनुसार काम नभएको बताउनु भएको छ । महागढीमाई नगरपालिकाको नवनिर्मित प्रशासकीय भवनको समुद्घाटन समारोहलाई सम्बोधन गर्नुहुँदै अर्थमन्त्री डा. प्रकाशशरण महतले भन्नुभयो, ‘बाराको उत्पादन, उत्पादकत्व बढोस्, किसानको जीवनस्तर माथि उठोस् भन्ने सरकारको चाहना हो ।
बाराका किसानका लागि पर्याप्त सिँचाइ छैन, सुनकोशी मरिन डाइर्भसनले सिँचाइमा थप मद्दत पुग्ने मन्त्री डा. महतले बताउनु भयो । उहाँले भन्नुभयो, ‘कृषिका कारणले मात्र बारा महत्वपूर्ण होइन, सिमरा औद्योगिक करिडोर पनि बारामै पर्छ । यहाँ धेरै उद्योग व्यवसाय स्थापित छ । अझै धेरै उद्योग व्यवसाय यस क्षेत्रमा आओस् भन्ने सरकारको चाहना हो । यसले स्थानीय जनताको रोजगारी र आवश्यकतालाई थप सहयोग पुग्छ ।’
‘तराईसँग काठमाडौं जोड्ने द्रुतमार्ग पनि निर्माण हुँदैछ । यो मार्ग छिटो सम्पन्न गर्नुपर्छ भनेर सरकारले खबरदारी गरिरहेको छ । यो मार्ग निर्माण सम्पन्न भएपछि काठमाडौं–बाराको दूरी ४५ मिनेटमा झार्नेछ’ मन्त्री डा. महतले भन्नुभयो, ‘बाराबाट एकैदिनमा काठमाडौं पुग्ने र काम सकेर फर्किने वातावरण बन्दैछ । त्यत्ति मात्र होइन, अन्तर्राष्ट्रिय विमानस्थल पनि बारामै बन्दैछ, विविध कारणले यो ढिलाइ भएको छ । यसबारेमा भारतलगायत अन्य विभिन्न लगानीकर्तासँग कुराकानी भइरहेको छ ।’
‘द्रुतमार्ग र अन्तर्राष्ट्रिय विमानस्थल बारामा निर्माण भएपछि बाराको आर्थिक विकासले छर्लाङ मार्छ । यहाँका जनताको जीवनस्तर धेरै माथि उठ्छ’ मन्त्री डा. महतले भन्नुभयो, ‘भारतसँग निकासी र पैठारी गर्ने नाका भएन भन्ने बाराबासीको जुन गुनासो छ, यसलाई सम्बोधन गर्न मैले तीनवटा नाका निरीक्षण गरें, अध्ययन भइरहेको छ । नाका खोल्न हामीले मात्र ल्याउने र दिने भनेर हुँदैन, दुवै देशको सहमति र साझेदार चाहिन्छ । दुवैतिर पूर्वाधार हुनुपर्छ । एउटा ठूलै नाका बारामा होस् भन्ने सरकारको चाहना हो ।’
‘धैर्य गर्नुहोला, अध्ययनको आधार र भारतसँग छलफलपछि बारा एउटा नाका खुल्न सक्छ’ मन्त्री डा. महतले भन्नुभयो, ‘यसवर्ष सातै प्रदेशको धार्मिक स्थल र सांस्कृतिक केन्द्रको विकासका लागि बजेट राखिएको छ । बाराको गढीमाइलाई पनि २ करोड रुपैयाँ बजेट विनियोजन गरिएको छ । पर्यटकीय र उत्पादनको क्षेत्र, पूर्वाधार विकास सरकारको प्राथमिकताको क्षेत्र हो ।’
