नेपाल टेलिकमले ल्यायो १ जीबीपीएस उच्च गतिको एफटीटीएच इन्टरनेट
काठमाडौं । नेपाल टेलिकमले १ जीबीपीएस (१००० एमबीपीएस)सम्म गति भएको एफटीटीएच इन्टरनेट सेवा शुरू गरेको जनाएको छ । यसअघि कम्पनीले १०० एमबीपीएससम्म गति भएको एफटीटीएच सेवा दिइरहेको थियो ।
हाल कम्पनीले जीपोन (GPON) प्रविधिमार्फत उपलब्ध गराइरहेको एनटी फाइबर इन्टरनेटमध्ये सबैभन्दा उच्च गति १०० एमबीपीएस रहेकोमा अब एक्सजीपोन (XGPON) प्रविधिमा आधारित उच्च गतिको इन्टरनेट सेवा उपलब्ध हुने भएको हो ।
सो सेवा ५०० एमबीपीएस र १ जीबीपीएस गरी दुई ओटा प्याकेजमा उलपब्ध हुनेछ भने यसको डाउनस्ट्रिम क्षमता १० जीबीपीएस र अपस्ट्रिम क्षमता २.५ जीबीपीएस हुनेछ ।
प्रिमियम एफटीटीएच ५०० एमबीपीएस अन्तर्गत टेलिकमको नेटवर्कभित्र अनलिमिटेड कल गर्न सकिनेछ भने अन्य नेटवर्कमा प्रतिमहिना ३५० मिनेट कल गर्न सकिनेछ । यो प्याकमा ०.५ टीबी डाटा प्रतिदिन प्रयोग गर्न सकिने छ ।
प्रिमियम एफटीटीएच १ जीबीपीएस अन्तर्गत नेपाल टेलिकमको नेटवर्कभित्र अनलिमिटेड कल गर्न सकिनेछ भने अन्य नेटवर्कमा प्रतिमहिना ५ सय मिनेट कल गर्न सकिनेछ । यो प्याकमा १ टीबी डाटा प्रतिदिन प्रयोग गर्न सकिनेछ ।
दुवै प्याकेजमा एउटा आईपीटीभी, सीपीई र सेटटप बक्स तथा ३०० मिटर ड्रप फाइबर निःशुल्क उपलब्ध हुनेछ ।
५०० एमबीपीएसको ‘प्रिमियम एफटीटीएच ५०० एमबीपीएस’ प्याकेज वार्षिक ८० हजार रुपैयाँ र १ जीबीपीएसको ‘प्रिमियम एफटीटीएच १ जीबीपीएस’ प्याकेज वार्षिक १ लाख १० हजार रुपैयाँमा उपलब्ध हुनेछ ।
यो सेवा वा अन्य एफटीटीएच सेवा प्राप्त गर्न चाहनेले मुलुकभरका सेवाग्राहीहरूले १९८–१ -१९८ मा डायल गरी प्राप्त सन्देशपश्चात फेरि १ डायल गरी) मा डायल गरेर आफूलाई आवश्यक पर्ने सेवा जडान तथा मर्मतका लागि दर्ता गर्न सकिने व्यवस्था छ ।
हालका लागि काठमाडौं उपत्यकामा यो सेवा उपलब्ध गराइएको छ ।
